Фудбалската федерација на САД официјално потврди дека Маурисио Покетино ќе остане на селекторското столче најмалку до Светското првенство во 2030 година.
Откако ја презеде селекцијата во септември 2024 година, Покетино го подигна нивото на игра и испиша историја на Мундијалот во 2026. Под негова палка, Американците ја освоија својата група, стигнаа до осминафиналето и ја забележаа првата елиминациска победа на светските првенства по 2002 година – поставувајќи нов национален рекорд по број на победи на еден турнир.
Улогата на Покетино повеќе нема да биде врзана исклучиво за сениорскиот тим. Заедно со неговиот стручен штаб, тој добива пошироки надлежности кои вклучуваат и менторирање и развој на младинските национални селекции.
„Во изминатите две години увидовме колкав е вистинскиот потенцијал на американскиот фудбал. Возбудени сме што ќе придонесеме не само преку резултатите на теренот, туку и преку развојот на играчите, тренерите и целосната фудбалска инфраструктура во земјата,“ изјави Покетино по потпишувањето на договорот.
Со овој потег се става крај на шпекулациите за негово враќање во татковината.
Името на Покетино сериозно се поврзуваше со клупата на Аргентина, како можен наследник на Лионел Скалони, особено по поразот на „гаучосите“ од Шпанија во финалето на неодамнешниот Мундијал.
