Македонските фудбалски ветерани вчера во Варна, Бугарија, одиграа пријателски хуманитарен натпревар против златната генерација на бугарската фудбалска репрезентација од 1994 година. Натпреварот беше организиран за помош на настраданите во големата трагедија што неодамна се случи во Кочани.
Нашите ветерани на крајот славеа со 2-3, а по натпреварот еден од најдобрите македонски фудбалери во историјата, Горан Пандев, на прес-конференцијата јавно им се заблагодари на организаторите за прекрасната организација и поддршката.
„Најпрво сакам да ви се заблагодарам од наше име, од името на цела Македонија, како и од името на претседателот на Фудбалската федерација на Македонија. Благодарни сме за прекрасната организација – за нас беше чест да го одиграме овој натпревар со најдобрата генерација на бугарскиот фудбал. Се надевам дека и во иднина ќе имаме вакви можности. Ве очекуваме да ни бидете гости и во Македонија.
Како што кажа Христо (Стоичков), децата не можеме да ги вратиме. Тоа беше голема трагедија, не само за Македонија, туку и за цела Европа. Се надеваме дека никогаш повеќе нема да се повтори. Со оваа иницијатива сакавме да помогнеме колку што можеме, затоа што спортот е најголемиот амбасадор. Одигравме добар натпревар, се забавувавме, игравме како браќа, и навистина ни беше чест што сме тука“, изјави Горан Пандев.
