Португалскиот репрезентативец Жоао Палиња би можел да го напушти Баерн Минхен веќе ова лето, само една сезона по неговото пристигнување од Фулам. Според германските медиуми, баварскиот гигант не е задоволен од придонесот на дефанзивниот играч за врска и е подготвен да го стави на трансфер-листата.
Баерн плати 51 милион евра за Палиња во летото 2024 година, но под водство на новиот тренер Венсан Компани, тој не успеа да се наметне како стартер и најчесто е користен како резервна опција. Досега оваа сезона, Португалецот настапи на 21 натпревар во сите натпреварувања.
Дополнително, конкуренцијата во средниот ред ќе се зголеми со пристигнувањето на младиот Том Бишоф од Хофенхајм, што уште повеќе ја намалува улогата на Палиња во плановите на Компани.
Иако Баерн се надева дека ќе врати барем дел од вложените средства, останува нејасно дали некој клуб ќе биде подготвен да плати блиску до сумата од 50 милиони евра. Самиот Палиња, пак, сака да остане и да се избори за своето место, но шансите за тоа сè повеќе се намалуваат.
