Претседателот на Фудбалската федерација на Македонија, Масар Омерагиќ, оствари средба со еден од најреномираните македонски фудбалски стручњаци во странство – Влатко Андоновски. Двајцата имаа содржаен разговор посветен на актуелни и идни теми од фудбалот, а средбата беше заокружена со симболична размена на дресови од Македонија и Канзас.
Поранешниот селектор на женската репрезентација на САД и актуелен тренер во Канзас остави силен впечаток, а Омерагиќ не го криеше задоволството од средбата, што ја сподели и на социјалните мрежи.
„Убава и инспиративна средба со Влатко Андоновски, поранешен селектор на женската репрезентација на САД и тренер во Канзас. Секогаш е посебно чувството кога со наши успешни луѓе разменуваме идеи и визии за играта што нè обликувала и нè поврзува. Се надевам дека следната средба ќе биде во неговиот Канзас – таму каде што фудбалот можеби звучи поинаку, но се чувствува исто. Светско првенство 2026… продолжуваме и веруваме“, напиша Омерагиќ.
