Легендарниот германски голман Оливер Кан без двоумење го избра својот фаворит во вечната дебата за најдобар фудбалер на сите времиња. Според него, бразилскиот ас Роналдо Назарио е недостижен за сите, вклучително и за Лионел Меси и Кристијано Роналдо.
„За мене, Роналдо беше многу подобар од Меси и од Кристијано“, изјави Кан, потенцирајќи дека Бразилецот го смета за најкомплетниот играч што некогаш го видел.
Иронијата е што токму Роналдо беше кобен за Кан во финалето на Светско првенство 2002, кога со два гола ѝ ја донесе титулата на Бразил, оставајќи ја Германија без трофеј. Сепак, и покрај тој болен пораз, Кан нема дилеми – „Феноменот“ е број еден.
„Сè уште го гледам како најкомплетниот фудбалер во историјата. Тој е најдобриот што сум го видел“, додаде поранешниот чувар на мрежата.
Кан остави длабока трага во Баерн Минхен, за кој одигра 632 натпревари и освои сè што можеше да се освои на клупско ниво. Кариерата ја започна во Карлсруе, каде ги направи првите професионални чекори.
Од друга страна, приказната за Роналдо е добро позната. Кариерата ја почна во Крузеиро, блесна во ПСВ Ајндховен и Барселона, а вистински подем доживеа во Интер. И покрај двете тешки повреди на колената, се врати посилен и во 2002 година го одведе Бразил до светскиот трон.
Подоцна настапуваше и за Реал Мадрид, Милан и Коринтијанс, каде ја заврши кариерата во 2011 година.
Без оглед на новите генерации, за многумина, а особено за Оливер Кан, бразилскиот „Феномен“ останува неповторлив.
