Фудбалерите на Њукасл пропуштија одлична можност за победа, откако на домашен терен одиграа 2-2 против Челси во дербито од 17. коло на Премиер – лигата, иако имаа водство од два гола на „Сент Џејмс Парк“.
Домашниот тим тргна фуриозно и веќе во третата минута поведе преку Ник Волтемаде, кој се најде на вистинското место во вистинско време и ја смести топката во мрежата по конфузна реакција на одбраната на Челси.
Во 20. минута Германецот повторно беше прецизен и ја зголеми предноста на 2-0, реализирајќи одличен центаршут на Ентони Гордон. Тоа беше првпат Волтемаде да постигне два гола на еден натпревар по неговото летно пристигнување во Њукасл. Погодокот беше проверуван со ВАР поради сомнеж за офсајд, но по подолга анализа беше признат.
Челси имаше момент во 43. минута кога Педро Нето ја затресе мрежата, но погодокот беше поништен поради игра со рака, па домаќините заминаа на пауза со комотна предност.
Сепак, сликата на теренот целосно се промени во второто полувреме. Веќе во 48. минута Рис Џејмс со прецизен слободен удар го совлада голманот на Њукасл и го врати Челси во игра. Од тој момент гостите ја презедоа контролата, а Џејмс повторно се закани осум минути подоцна, но неговиот удар беше блокиран.
Во 57. минута Арон Рамсдејл мораше сериозно да интервенира по силниот шут на Педро Нето, а девет минути подоцна Челси заслужено стигна до израмнување. Жоао Педро рутински реализираше по одличен продор и елегантен дриблинг, со што го постигна својот прв гол во Премиер – лигата по подолга пауза.
Њукасл делуваше бледо во продолжението, што најдобро го отслика катастрофалниот обид на Фабијан Шер од слободен удар во 72. минута. Неколку минути подоцна Харви Барнс се најде во шеснаесетникот на Челси, но неговиот пад предизвика повеќе негодување отколку надеж за пенал.
Барнс имаше уште една одлична можност да го врати водството, но Рис Џејмс со мајсторски старт ја спаси својата екипа. Во финишот се закануваа и двата тима – Каиседо и Гарначо за Челси, како и Барнс за Њукасл – па голот „висеше“ до самиот крај.
Во последните минути домаќините можеби ја пропуштија и најдобрата шанса за победа, откако Еланга одлучи себично да ја заврши контрата сам, иако имаше подобро поставени соиграчи. Натпреварот заврши без победник, но со чувство кај Њукасл дека испушти сигурни три бода.
