Милан е на чекор од договор за ангажман на Кристофер Нкунку од Челси за сума од околу 36 милиони фунти. Францускиот напаѓач, кој не е дел од плановите на клубот од „Стемфорд Бриџ“, веќе пристигна во Италија каде што ќе ги изврши задолжителните медицински прегледи.
Овој трансфер означува крај на две тешки и разочарувачки сезони за Нкунку во Лондон. По неговото пристигнување од Лајпциг во 2023 година за 52 милиони фунти, сериозната повреда му ја уништи првата сезона, додека минатата не успеа да се наметне во тимот на Енцо Мареска.
27-годишниот Французин не беше вклучен во составот на Челси за првите два натпревари во Премиер – лигата оваа сезона, што беше јасен сигнал од Мареска дека не смета на него.
Нкунку имаше опција и за трансфер во Баерн Минхен, каде веќе беа договорени личните услови, но баварците инсистираа само на позајмица – нешто што играчот и Челси не го прифатија.
