Вардар, најтрофејниот фудбалски клуб во Македонија, засега нема да врши никакви промени во составот – ниту нови трансфери, ниту нови имиња – сè додека трае европската авантура во Конференциската лига.
Иако во јавноста се појавија шпекулации за можен ангажман на репрезентативците Дарко Велковски и Бобан Николов, од клубот ги демантираат ваквите најави. Од раководството порачуваат дека целосниот фокус моментално е ставен на европските настапи, каде што целта е јасна – да се оди колку што е можно подалеку.
Трансфери се можни, но дури по завршувањето на настапите во Европа, и тоа само ако некој од актуелните првотимци биде продаден. Засега, Вардар нема простор за нови странци, бидејќи квотата е веќе исполнета, а клубот останува со актуелниот ростер за европските предизвици.
Пред Вардар е реваншот против Ла Фиорита во Сан Марино, каде македонскиот тим патува со удобна предност од три гола, остварена на првиот натпревар во Скопје. Доколку го потврди пласманот, „црвено-црните“ во второто квалификациско коло ќе се соочат со далеку посериозен предизвик – швајцарскиот претставник Лозана.
