Милан продолжува да го следи лидерот Интер, откако на гостувањето кај Пиза стигна до важна победа од 1-2 во новото коло од Серија А.
„Росонерите“ уште еднаш покажаа дека знаат како да ги освојуваат бодовите и кога не блескаат. Тимот славеше со минимална разлика – сценарио што стана заштитен знак оваа сезона, бидејќи најголем дел од победите се изборени со еден гол предност.
Гостите поведоа во 39. минута преку Рубен Лофтус-Чик, кој ја круниса иницијативата на својот тим. Милан имаше можност да ја зголеми предноста на стартот од вториот дел, но ВАР поништи погодок поради игра со рака, а потоа Никлас Фулкруг не успеа да реализира удар од белата точка.
Пиза ја искористи таа шанса и во 71. минута преку Лојола израмни на 1-1, враќајќи ја неизвесноста во мечот.
Сепак, искуството на Лука Модриќ пресуди – во 85. минута Хрватот со мајсторски потег го донесе триумфот за миланскиот состав.
Со новите три бода, Милан останува втор на табелата со 53 бодa, додека Пиза останува закована на дното и ја очекува неизвесна борба за опстанок.
