Младата фудбалска репрезентација на Македонија до 21 година му гостува на Израел, а потоа ја пречекува Црна Гора во двата последни меча од квалификацискиот циклус. Селекторот Благоја Милевски очекува националниот тим да се претстави на најдобар начин и ќе бара победа на двете средби. Не е неважно како ќе се заокружи циклусот, напротив…
„Сметам дека е многу важно да ги заокружиме овие квалификации со натпревари во кои ќе прикажеме добра игра и секако ќе бараме победа. Во двата претходни меча игравме без тројца стандардни фудбалери од првиот состав, Ристовски, Серафимов и Фазлагиќ, а против Израел бевме и без Руфати. За дуелите кои следуваат повторно не можеме да сметаме на Ристовски и Фазлагиќ, но се враќаат Серафимов и Руфати. Впечатокот е дека направивме одлична селекција, играме квалитетен циклус, се надевам дека во таа насока и ќе завршиме, а ќе видиме што ќе ни донесе тоа на крај. Голем дел од фудбалерите веќе потврдија дека имаат потенцијал за А репрезентацијата, а тоа значи дека сме направиле добра работа“, изјави селекторот на селекцијата на Македонија до 21 година, Благоја Милевски.
