Милан официјално го претстави Ардон Јашари како ново засилување во средниот ред, кој доаѓа од белгискиот Клуб Бриж.
Швајцарскиот репрезентативец, кој има 23 години, пристигнува за вкупна сума од околу 39 милиони евра – што претставува најскап трансфер во историјата на белгиската лига. Претходно Бриж одби неколку понуди од Милан пред да се постигне договорот.
Јашари потпиша договор до 2030 година и ќе го носи дресот со број „30“. Тој е третото засилување во средниот ред на „росонерите“ летово, по ангажманите на Лука Модриќ и Самуеле Ричи.
Минатата сезона Јашари беше прогласен за најдобар играч во белгискиот шампионат. За Бриж одигра вкупно 52 натпревари, постигна четири гола и запиша шест асистенции. Од минатата година е дел од тимот, а досега има и четири настапи за швајцарската репрезентација.
Инаку Ардон Јашари има македонско потекло, со оглед дека неговите родители потекнуваат од Куманово.
