Лионел Меси (39) ќе го одигра својот последен натпревар за аргентинската репрезентација на 6 октомври во Буенос Аирес, на стадионот „Монументал“, против Бенин. Тоа ќе биде кулминација на серијата од три пријателски натпревари со кои ќе биде одбележан неговиот репрезентативен крај, а селекторот Лионел Скалони последен пат ќе го стави капитенот на списокот.
Со тоа ќе биде заокружена блескавата репрезентативна кариера на Меси, во која ги освои сите најважни трофеи – Светското првенство, две Копа Америка и олимпиското злато.
Меси е рекордер на аргентинската репрезентација по бројот на настапи (207), голови (125) и асистенции (68). Аргентинската фудбалска федерација организираше посебна серија натпревари како благодарност за неговиот огромен придонес во националниот тим, со кој остана силно поврзан и покрај тоа што уште како млад го напушти Росарио и се пресели во Барселона.
Централниот настан ќе биде натпреварот против Бенин на 6 октомври во Буенос Аирес, на кој Меси официјално ќе се збогува од националниот дрес.
Пред тој дуел, Аргентина ќе одигра и натпревари против Боливија и Буркина Фасо. Целата серија ќе биде можност аргентинската јавност да се прости од својот капитен и од еден од најголемите фудбалери во историјата.
Интересно е што Меси, капитен и легенда на една од најреномираните репрезентации во светот, последниот натпревар во националниот дрес ќе го одигра против репрезентација која е далеку од фудбалскиот врв.
Бенин моментално е на 93. место на ранг-листата на ФИФА и никогаш не се пласирал на Светско првенство. Пет пати настапил на Африканскиот куп на нации, последен пат минатата година, но ниту еднаш не успеал да заврши меѓу првите две репрезентации во групата.
