Фудбалските федерации на Мексико и Аргентина ја изразија својата поддршка за претседателот на ФИФА, Џани Инфантино, во момент кога првиот човек на светскиот фудбал се соочува со остри критики поради веќе повлечениот предлог за продажба на дел од комерцијалните права на Светското првенство.
Мексиканската фудбалска федерација (ФМФ), коорганизатор на неодамна завршеното Светско првенство, се дистанцираше од сопствената регионална конфедерација и застана зад Инфантино, откако КОНКАКАФ побара „целосно преиспитување“ на неговото претседателствување.
Во четвртокот Африканската фудбалска конфедерација (ЦАФ) едногласно го поддржа раководството на Инфантино, додека европската фудбалска централа УЕФА порача дека останува на ставот за бојкот на Светското првенство и другите турнири на ФИФА.
Азиската конфедерација соопшти дека изразува „солидарност“ со УЕФА и КОНКАКАФ, која го раководи фудбалот во Северна и Централна Америка и Карибите. Сепак, јужноамериканската конфедерација КОНМЕБОЛ во четвртокот објави соопштение во кое ги отфрла сите обиди за смена на Инфантино кои не би вклучувале гласање од сите 211 членки на ФИФА.
Фудбалската федерација на Мексико се приклучи кон овој став.
„Федерацијата нема да признае, ниту да одобри каков било процес започнат надвор од оваа институционална рамка и се приклучува кон повикот на претседателот Инфантино да продолжиме колективно да го развиваме фудбалот во корист на 211-те членки на ФИФА“, се наведува во соопштението.
Последиците од спорниот предлог фрлија сенка врз кандидатурата на Инфантино за четврти мандат на Конгресот на ФИФА во Мароко во март, нешто што до пред два месеци изгледаше како однапред решена работа.
Сепак, сè уште нема јасен кандидат кој би можел да му се спротивстави на Инфантино на изборите, а швајцарскиот функционер и понатаму има значителна поддршка, вклучително и од светскиот шампион од 2022 година, Аргентина.
Во писмо до Инфантино, Аргентинската фудбалска асоцијација (АФА) ја изрази својата поддршка за работата на ФИФА во последните 10 години, нагласувајќи дека таа била „насочена кон развој на фудбалот низ целиот свет и институционална стабилност заснована на јасен, стабилен и транспарентен модел на управување“.
Иако АФА призна дека предлогот предизвикал голема несигурност и дека биле направени грешки, смета дека решението е продолжување на работата под раководство на ФИФА пред Конгресот следната година.
Хрватската фудбалска федерација, пак, беше меѓу националните федерации кои ја повлекоа поддршката за Инфантино, откако Англија, Велс, Србија и Албанија претходно направија сличен чекор.
„Одлуката беше донесена по детална проценка во рамките на федерацијата, во светло на последните случувања поврзани со Светското првенство во фудбал на ФИФА 2026 и дискусиите во нашите управни тела“, соопшти хрватската федерација.
Во четвртокот, синдикатот на фудбалери ФИФПро изјави дека предлогот на Инфантино не претставува само неуспех во управувањето, туку и „сериозна злоупотреба на претседателската власт“.
