Додека селекторите ја анализираат формата на своите фудбалери, навивачите сонуваат за шампионски трофеј, а обложувалниците ги објавуваат квотите за фаворитите, германскиот математичар Јоаким Клемент веќе има свој одговор на прашањето кој ќе стане светски шампион во 2026 година.
Човекот кој привлече големо внимание со тврдењето дека успешно ги предвидел последните три светски шампиони, овојпат смета дека најголеми шанси за титулата има Холандија.
Неговиот модел не се базира на моменталната форма или субјективни проценки. Наместо тоа, во пресметките се вклучени повеќе фактори како што се бруто домашниот производ на државата, бројот на жители, фудбалската традиција и позицијата на ФИФА ранг-листата.
Според прогнозата на Клемент, едно од најголемите изненадувања на турнирот би го приредила Јапонија, која во нокаут-фазата би ја елиминирала Бразил и би го испратила петкратниот светски шампион дома многу порано од очекуваното.
Интересна е и прогнозата за јужноамериканските селекции. Според моделот, Аргентина би била единствениот претставник од тој континент меѓу осумте најдобри репрезентации, но нејзиниот настап би завршил во четвртфиналето против Португалија.
Клемент предвидува дека Португалија ќе стигне до големото финале, каде што ќе се соочи со Холандија. Според неговите пресметки, „лалињата“ конечно ќе го освојат долго посакуваниот трофеј и ќе ја прекинат децениската потрага по светска титула.
Секако, историјата на фудбалот многупати покажала дека бројките не можат да предвидат сè. Повредите, моментите на инспирација, индивидуалниот квалитет или една грешка често ги рушат и најпрецизните прогнози.
Сепак, кога математиката толку убедливо посочува фаворит, тешко е да не се привлече вниманието на фудбалската јавност. Дали Клемент повторно ќе биде во право или фудбалот уште еднаш ќе покаже дека е непредвидлив, ќе дознаеме по завршувањето на Светско првенство 2026.
