Норвешкиот напаѓач Ерлинг Халанд нема да биде капитен на Манчестер Сити додека Енцо Мареска е на тренерската позиција, а италијанскиот стратег откри и зошто донел таква одлука.
Причината е поврзана со неверојатната голгетерска форма на норвешкиот напаѓач. Мареска има специфично правило кое го применувал и во Лестер и во Челси – секогаш кога тимот ќе постигне гол, капитенот мора да дојде до аут-линијата за да добие нови инструкции од стручниот штаб, наместо веднаш да слави со соиграчите.
Токму поради тоа, Мареска смета дека Халанд не би бил идеален избор за капитенската лента, бидејќи е фудбалерот кој најчесто ја тресе противничката мрежа.
„Во Лестер и Челси имав правило дека кога ќе постигнеме гол, капитенот мора да дојде до клупата по инструкции, а не да слави“, објасни Мареска за време на претсезонската турнеја на Сити во Азија.
„Сепак, ако капитенот го постигне голот, тогаш може да слави. Но, ако Ерлинг беше капитен… по ѓаволите, ќе имавме проблем. Можете ли да си замислите?“, низ смеа додаде италијанскиот тренер.
Мареска смета дека овие кратки разговори покрај теренот можат да имаат големо тактичко значење, дури и кога траат само неколку моменти.
„Мислам дека, дури и ако прекинот трае само две или три минути, секогаш постои нешто што може да се промени или прилагоди на теренот“, истакна тој.
Ситуацијата околу капитенската лента во Манчестер Сити моментално е неизвесна. По заминувањето на Бернардо Силва, клубот треба да избере нов лидер, а Мареска потврди дека има неколку кандидати.
„Во овој момент имаме тројца или четворица капитени, но еден ни недостасува. Тоа е Родри, кој се опоравува од операцијата на грбот. Во неговиот случај, со оглед на тоа што се поврзува со Барселона, останува да видиме што ќе се случи“, заклучи менаџерот на Сити.
