Голманот Мануел Нојер размислува за продолжување на договорот со Баерн Минхен, и покрај очекувањата дека неговата професионална кариера би можела да заврши во 2026 година, пишува германскиот весник „Билд“.
39-годишниот голман, кој е дел од Баерн од 2011 година, сè уште игра на високо ниво и веќе забележа три натпревари без примен гол од стартот на сезоната.
Нојер потпиша нов договор порано оваа година, кој важи до јуни 2026, но неговото повлекување од фудбалот можеби нема да се случи на крајот на тековниот договор.
Искусниот чувар на мрежата во моментов размислува да ја продолжи кариерата на клупско ниво, а од Баерн одлуката ја оставиле во негови раце. Тоа, секако, ќе влијае на плановите на тимот од Минхен, бидејќи останувањето на Нојер во составот ќе им даде повеќе време да испланираат кој ќе биде негов наследник на подолг рок.
Мануел Нојер има одиграно 569 натпревари во дресот на баварскиот гигант, освојувајќи 12 титули во Бундес-лигата и два трофеи од Лигата на шампионите.
