Фудбалскиот свет повторно ќе биде свртен кон Манчестер, каде што денеска на „Олд Трафорд“ се игра едно од најголемите дербија во Англија. Манчестер Јунајтед го пречекува градскиот ривал Манчестер Сити во дуелот кој го привлекува најголемото внимание во четвртото коло од Премиер – лигата.
Натпреварот започнува во 17:30 часот, а исходот би можел да има големо значење за амбициите на двата тима во новата сезона.
Манчестер Сити влегува во дербито со максимален учинок. „Граѓаните“ имаат девет бода од трите натпревари, по победите над Борнмут со 2-1, Кристал Палас со 4-1 и Ковентри со 1-0, со гол-разлика 7-2.
Добриот старт беше потврден и во Лигата на шампионите, каде што Сити во текот на неделата го совлада Порто со 0-2.
Манчестер Јунајтед, пак, моментално е на 11. место со четири бода. „Црвените ѓаволи“ сезоната ја отворија со неочекуван пораз од 0-2 против Хал Сити, но потоа следуваше убедлива реакција и победа од 5-2 над Ипсвич. Во последното коло Јунајтед одигра 2-2 на гостувањето кај Евертон.
Во европски рамки, тимот на Мајкл Карик дополнително ја подигна самодовербата со убедливиот триумф од 4-0 против Сабах.
Сепак, Карик има и кадровски проблеми. Манчестер Јунајтед нема да може да смета на повредените Матијс де Лихт, Том Хитон и Мануел Угарте, додека неизвесни се Карлос Балеба и Амад Диjало.
Кај Манчестер Сити главното отсуство е Жереми Доку. Крилниот напаѓач има повреда на листот и според менаџерот Енцо Мареска, сè уште не е подготвен за настап. Добра вест за гостите е враќањето на Нико О’Рајли, кој целосно се опорави од проблемите со грбот.
Историјата на меѓусебните дуели е богата. Двата клуба досега одиграле 198 официјални натпревари во сите натпреварувања. Јунајтед има 81 победа, Сити славел 62 пати, додека 55 средби завршиле без победник.
Последните пресметки, сепак, покажуваат колку е неизвесно ова ривалство. Јунајтед победи со 2-0 во јануари 2026 година, Сити возврати со 3-0 во септември 2025, додека дуелот на „Олд Трафорд“ во април минатата година заврши без голови.
Во декември 2024 година, Јунајтед славеше со 2-1 на „Итихад“, додека во август истата година двата тима играа и за трофејот во Комјунити Шилд. По 1-1 во регуларниот дел, Сити беше поуспешен на пенали.
Сега историјата се пишува одново. „Олд Трафорд“ е сцената, Манчестер е поделeн на црвено и сино, а трите бода имаат дополнителна тежина во битката за англискиот фудбалски врв.
