Брегалница и Тиквеш водат жестока борба за врвот на Истокот, Гостивар малку губи здив на Западот, но се уште е на лидерската позиција. По еден викенд „административна пауза“ повторно се враќаат возбудувањата на македонската фудбалска сцена, а време е за преглед на најдоброто во октомври.
МАКФУДБАЛ го избра тимот на месецот во Вторите лиги Исток и Запад.
1. СТОЈАН ДИМОВСКИ (ТИКВЕШ)
На последните четири натпревари Тиквеш прими само еден гол. Одбраната е цврста, но зад секоја добра одбрана стои стабилен голман. Столе Димовски е искусен и прволигашки квалитет.
2. ВАНЧЕ ШИКОВ (ТИКВЕШ)
Можеби е во зрели фудбалски години, но знаењето никој не може да му го одземе, плус надополнето и со неверојатното искуство. Шиков со леснотија ги решава дуелите на второлигашката сцена и се уште доминира.
3. АНТОНИО МИТРЕВ (БРЕГАЛНИЦА)
Одличен во дефанзивата, но таличен за тимот и во офанзивните излети. Постигна гол за триумф против Победа, многу важни бодови во трката со Тиквеш за врвот.
4. ДАРКО СТОЈАНОВ (БРЕГАЛНИЦА)
Без него и не може да се замисли одбраната на штипскиот второлигаш. Од позадина ја диктира играта, командува, често знае и да се уфрли во нападот и да постигне погодок.
5. МАРТИН БЛАЖЕВСКИ (СКОПЈЕ)
Скопје има амбиции за враќање во елитата, а Мартин Блажевски е еден од оние кои даваат тон на играта на „пиратите“ од Автокоманда. Главна алка, спој меѓу одбраната и средниот ред.
6. ПЕТАР ЉАМЧЕВСКИ (ГОСТИВАР)
Не е се сјајно во Гостивар, но, сепак, лидери се на Западот и имаат неколку квалитетни фудбалери од прволигашки ранг. Таков е и Петар Љамчевски кој ги влече конците на играта, а изминатиот месец играше навистина квалитетно.
7. ЃОРЃИ МОЈСОВ (ТИКВЕШ)
Кој си знае – си знае. Можеби и веќе го нема оној трк од минатото, но неговите топки веднаш прават гол – шанса. Тој е еден од столбовите во составот на Тиквеш кој ги гази конкурентите на Истокот.
8. МАРТИН СТОЈАНОВ (БРЕГАЛНИЦА)
Веднаш е воочливо кога некој прави разлика на фудбалскиот терен. Мартин Стојанов е таков калибар, брз и пробивен, вистински „пакер“, со него Брегалница е многу поопасна во завршницата.
9. АЛТИН ЛОГА (ВЕЛЕШТА)
Велешта одлично се држи на табелата на Западот, а главна оска во тимот секако е Алтин Лога. Ја презема одговорноста и за креирање, но пред се во реализација на шансите. Постигна неколку прекрасни гола во октомври.
10. ХРИСТИЈАН КИРОВСКИ (ГОСТИВАР)
Гостивар силно „тресна“’ во Кадино каде потфрли целиот тим, но претходно победуваше, а една од главните алки во секој триумф е искусниот напаѓач Христијан Кировски. Умее да погоди и од најмала шанса, перманентна опасност пред голот на противникот.
11. СИМЕОН ХРИСТОВ (ТИКВЕШ)
Симе стрела како на лента. Има голема поддршка од соиграчите, се редат шанси пред противничкиот гол, но треба и да знаеш да ја погодиш мрежата. А Симеон Христов тоа го прави одлично во дресот на Тиквеш. Во октомври беше речиси совршен.
ТРЕНЕР НА МЕСЕЦОТ: РАДЕ ЦИЦМИЛОВИЌ (ТИКВЕШ)
Тиквеш нанижа четири убедливи победи во октомври. Тој поседува и квалитетен тим, тоа е јасно, но треба и да знаеш да го водиш на вистински начин. За второлигашка конкуренција Тиквеш има неколку „ѕвезди“, треба добро да се вкомпонираат во една тимска целина.
