Македонскиот второлигаш Еуромилк Горно Лисиче доби нов шеф на стручниот штаб. Клубот денес официјално го промовираше искусниот Љупчо Димовски, кој ќе ја преземе екипата во продолжението од сезоната.
Димовски зад себе има богата тренерска кариера и работел во голем број македонски клубови, меѓу кои Вардар, Металург, Балкан, Скопје, Кожув, Тетекс и Хоризонт. Искуство има и од грчкиот фудбал, каде што бил дел од Касторија, Јанина, Кавала, Пиерикос и Трикала.
Новиот тренер на Еуромилк ГЛ има богато искуство и како фудбалер. Како голман во минатото го носел дресот на Вардар, Металург, Тетекс, Победа, Беласица и Работнички.
Од клубот веруваат дека неговото искуство и знаење ќе донесат дополнителен квалитет во работата на тимот и ќе помогнат во остварувањето на целите во продолжението од сезоната.
Во исто време, Еуромилк ГЛ му се заблагодари на досегашниот шеф на стручниот штаб Јован Трајков за досегашниот ангажман и придонесот во работата на клубот, со желби за успех во неговата понатамошна кариера.
За Димовски, пак, првиот предизвик е веќе пред него, а од клубот очекуваат неговото доаѓање да донесе позитивен импулс и подобри резултати во продолжението од сезоната.
