Првиот голман на Ливерпул, Алисон Бекер, ќе го пропушти следниот период од околу шест недели поради повреда на мускулот, која ја заработи при поразот од 0-1 против Галатасарај во Лигата на шампионите, пренесуваат британските медиуми.
Медицинските прегледи покажаа дека 33-годишниот Бразилец има повреда во задниот дел на бутниот мускул, а очекувањата се дека ќе биде надвор од теренот најмалку до репрезентативната пауза во ноември. Ова значи дека сигурно ќе го пропушти дербито со Челзи овој викенд, како и важните натпревари против Манчестер јунајтед (19 октомври), Реал Мадрид (4 ноември) и Манчестер сити (9 ноември).
Досега оваа сезона Алисон одигра девет натпревари, примајќи 12 голови и забележувајќи две „чисти мрежи“. Во негово отсуство, на голот ќе застане летното засилување на „црвените“, Ѓиорги Мамардашвили.
