Англискиот првак Ливерпул успеа да доведе нов стопер во последните часови од зимскиот преоден рок. Бен Дејвис од Престон е дефанзивното решение за менаџерот Јирген Клоп.
По повредите на Вирџил ван Дајк и на Џо Гомез, „црвените“ мораа да изнаоѓаат принудни решенија во одбраната, во опција беа неколку дефанзивци, а во последен момент не беше реализиран трансферот на Дује Чалета – Цар од Олимпик Марсеј.
Францускиот клуб не му дозволил на фудбалерот да направи трансфер иако речиси се било договорено. На хрватскиот интернационалец пред полетување на авионот за Ливерпул му соопштиле дека сепак трансферот пропаѓа. Сепак, постои можност и во текот на денешниот ден да се „испеглаат“ работите со Олимпик Марсеј.
Ливерпул ќе плати 2 милиони евра за ангажманот на 25-годишниот дефанзивец Бен Дејвис, кој има исто име како фудбалерот на Тотенхем.
