Лионел Меси ја воодушеви публиката во Мајами со посебна прослава по голот со кој му помогна на неговиот Интер да ја победи Филаделфија Унион со 2-1. Aргентинскиот фудбалер ја посвети прославата на Новак Ѓоковиќ, еден од најдобрите тенисери на сите времиња.
Меси влезе во игра во 54. минута, а веќе по две минути успеа да го постигне клучниот погодок за водство од 2-0. По постигнатиот гол, славниот Аргентинец имитираше форхенд удар карактеристичен за Ѓоковиќ, што веднаш беше поврзано со нивната неодамнешна средба во Мајами.
Неговиот гест ги воодушеви српските навивачи, кои со години го обожаваат Меси и Аргентина, а сега имаат уште една причина повеќе за симпатии кон славниот Аргентинец. „Браво, мајсторе!“, е коментарот што најчесто се појавува под многубројните објави поврзани со оваа прослава на „X“.
Ѓоковиќ вечерва ќе го игра финалето на Мастерсот во Мајами против Јакуб Меншик, а доколку победи, ќе ја освои својата јубилејна 100-та титула во својата величествена кариера. Не е исклучено дека на трибините повторно ќе се појави токму Меси и ќе му даде поддршка на српскиот тениски ас.
