Сезоната се приближува кон својот клучен период, а големата ѕвезда на Барселона, Роберт Левандовски (37), се најде во центарот на нова трансферна сага.
Според извештаите на германскиот „Билд“, полскиот голгетер и неговиот агент Пини Захави наводно одржале тајна средба со претставници на американскиот клуб Чикаго Фајер во Барселона, недолго пред празниците.
Оваа средба не била објавена во јавноста, но „Билд“ тврди дека била направена со цел да се разгледаат опциите на Левандовски во американската лига, која во последно време привлекува сè повеќе европски ѕвезди.
Според истите извори, меѓу присутните биле луѓе од Чикаго Фајер, а темата на разговорот бил потенцијален трансфер по истекот на договорот со Барселона.
Актуелниот договор на Левандовски со Барселона важи до 30 јуни 2026 година, што значи дека од почетокот на јануари ќе биде слободен да преговара со други клубови.
Иако во Каталонија владее вистинска транзициска атмосфера, Барселона веќе размислува за наследник на легендарниот број „9“, како Хулијан Алварез или други врвни напаѓачи, иако самиот Полјак сè уште не брза со конечната одлука.
Челниците на Барселона, вклучувајќи го и претседателот Жоан Лапорта, според медиумите, се свесни за овие преговори и ја следат ситуацијата. Интересот на МЛС-клубовите не е изненадување: лигата од САД цели кон доведување ѕвезди кои ќе ја зголемат видливоста и квалитетот на натпреварувањето, а квалитетот и искуството на Левандовски би било огромен „брендинг“ потег.
Полскиот напаѓач повеќепати нагласил дека нема паника околу заминувањето, дека е фокусиран на фудбалот и на тоа да ѝ помогне на Барселона до крајот на сезоната со цел да ја освои Ла Лига, но и да се обиде да дојде до нов трофеј во Лигата на шампионите.
