Барселона поминува низ период на големи промени, а една од клучните точки на зимскиот трансфер-период е иднината на Роберт Левандовски.
Иако во последните денови се шпекулираше за можен трансфер во Фенербахче, Роберт Левандовски јасно стави до знаење дека не размислува за заминување од Каталонија.
Турските медиуми неодамна објавија дека Фенербахче подготвува сериозна понуда за искусниот голгетер, но Левандовски не покажа никакво интересирање за премин во Истанбул. Со тоа заврши краткотрајната приказна која ги вознемири навивачите на Барселона.
Според информации блиски до играчот, Левандовски е целосно посветен на работата со тренерот Ханси Флик. Тие двајца се одлично запознаени уште од периодот во Баерн, што дополнително ја зајакна желбата на Полјакот да остане и да придонесе за проектот.
Сепак, Левандовски е свесен дека во современиот фудбал ништо не е трајно. Иако не сака да го напушти клубот во јануари, добро ја разбира бизнис страната на спортот и знае дека ситуацијата може брзо да се промени, особено во Барселона, каде финансиските предизвици се сè уште огромни.
Раководството на Барселона активно разгледува можност за доведување уште еден напаѓач за време на зимскиот рок. Клубот сака да ја засили конкуренцијата во нападот, што е потег кој директно би можел да влијае на статусот на Левандовски во тимот.
