Европската приказна на Црвена Звезда заврши драматично во Белград. И покрај минималната предност стекната на првиот натпревар, српскиот шампион не успеа да го одбрани капиталот и по продолженија беше елиминиран од Лил (0-2) во Лигата на Европа.
Во регуларниот тек францускиот состав ја анулираше негативата со погодок на искусниот Оливие Жиру, кој уште еднаш покажа дека годините не се пречка кога станува збор за големо европско искуство. „Црвено-белите“ имаа иницијатива и поддршка од трибините, но реализацијата изостана.
Одлуката падна во продолженијата. Во 99. минута Нгој ја искористи една од ретките можности и го постави конечниот резултат. Домаќините се обидоа да стигнат барем до погодок што ќе ги однесе во пенал-рулет, но недостасуваше завршниот удар и прецизност во клучните моменти.
Унгарскиот првак Ференцварош обезбеди пласман во следната рунда, откако на домашен терен со сигурни 2-0 го совлада Лудогорец. Со тоа беше анулирана негативата од првиот меч во Разград, а домаќините со дисциплинирана и тактички зрела игра го контролираа темпото и не дозволија изненадување.
На германско тло Штутгарт претрпе минимален пораз од Селтик (0-1), но тој резултат немаше елиминациска тежина. „Швабите“ на првата средба во Шкотска славеа убедливо со 1-4, што се покажа како доволна залиха за мирен реванш и потврда на пласманот во наредната фаза.
