Лацио има „три од три“. Римскиот тим продолжи со совршениот старт на сезоната, откако вечерва во Удине го совлада Удинезе со 1-2, иако домаќинот прв стигна до предност.
Избраниците на Џенаро Гатузо покажаа одлична физичка подготвеност и во самиот финиш го подигнаа ритамот, што на крајот им донесе целосно заслужен триумф.
Лацио подобро го отвори натпреварот и во првите дваесетина минути создаде неколку прилики преку Тавареш, Закани и Исаксен. Сепак, најсериозно се закани Удинезе. Камара доби топка на десната страна, се намести на левата нога и упати силен удар, но голманот Мандас одлично интервенираше.
Темпото потоа малку падна и без голови се замина на пауза.
А веднаш по стартот на второто полувреме – шок за гостите. Удинезе изведе одлична акција која започна уште од последната линија. Војвода ја испрати топката кон Дејвис, кој со маестрална реакција го проигра Карлстром, а тој погоди за 1-0.
Лацио мораше да тргне по израмнување. Тејлор и Фратези имаа свои обиди, а огромна шанса пропушти и Закањи. Сепак, како што се наближуваше крајот, гостите сè повеќе го преземаа контролата врз играта.
И потоа дојде израмнување.
Закањи направи одлична работа по левата страна, го мина својот чувар и испрати прецизна топка во срцето на шеснаесетникот. Таму беше Фратези, кој рутински реализираше за 1-1.
За Фратези ова беше веќе трет гол на исто толку натпревари на стартот од сезоната, со што уште еднаш потврди дека е меѓу најдобрите засилувања во летниот преоден рок во Италија.
Лацио продолжи да притиска. Закањи потоа од далечина ја погоди стативата, а во 88. минута стигна целосниот пресврт.
Дуки испрати одлична топка во шеснаесетникот, а новото засилување Гудмундсон со удар со глава ја затресе мрежата на Удинезе за 1-2 и победа на Лацио на гостински терен.
