Шкендија од Тетово со пресврт стигна до победа од 3-2 против Шкендија Арачиново во првиот полуфинален дуел од Купот на Македонија, и тоа откако на паузата замина со негатива од 1-2. Со овој триумф, тетовци си обезбедија минимална предност пред реваншот закажан за 6 мај.
Натпреварот започна динамично, со рано водство на домаќинот. Трумчи реализираше пенал уште во четвртата минута. Сепак, гостите од Арачиново не се поколебаа и до крајот на првото полувреме направија комплетен пресврт. Најпрво Нухија погоди за израмнување во 30. минута, а Ливарека во 43. донесе водство и изненадување пред паузата.
Во продолжението, фаворитот го наметна својот ритам и брзо се врати во игра. Ване Крстевски во 54. минута го израмни резултатот, а само петнаесетина минути подоцна, Анес Мелиќи го постави конечниот резултат со погодок за 3-2.
До самиот крај, Шкендија создаде уште неколку изгледни шанси, но реализацијата изостана, па тимот на Јетон Беќири ќе мора да ја брани оваа кревка предност на реваншот.
