Милан ја започна сезоната во Серија А на најлош можен начин – со шокантен пораз на „Сан Сиро“ од повратникот во елитата, Кремонезе, кој славеше со 1-2.
Гостите храбро влегоа во натпреварот и преку Федерико Башчирото дојдоа до водство во 28. минута. „Росонерите“ брзо возвратија – Страхиња Павловиќ погоди и го врати резултатот во рамнотежа пред полувремето. Сепак, тимот на Масимилијано Алегри делуваше бледо и без идеи во завршницата, што му остави простор на Кремонезе да се брани организирано и да ја чека својата шанса.
Во второто полувреме, Лука Модриќ беше моторот на Милан, но освен неколку блесоци на Салемакерс и Еступињан, неговите соиграчи не успеаја да го следат неговото темпо. Тоа го искористи гостинската екипа – во 61. минута, Федерико Бонацоли со фантастичен гол со „полу-ножички“ донесе ново водство за Кремонезе.
Алегри се обиде да внесе свежина со Чуквуезе и Јашари, но Милан немаше доволно креативност за да дојде до израмнување. Кремонезе ја издржа завршницата и со голема победа ја започна својата кампања по враќањето во Серија А.
На „Олимпико“, пак, Рома имаше посреќен старт. „Волчицата“ со минимални 1-0 ја совлада Болоња, благодарение на погодокот на Бразилецот Весли Франка во 53. минута.
