Tренерот на Баерн, Венсан Компани, даде оценка за настапот на својот тим на натпреварот против Арсенал од петтото коло во главната фаза на Лигата на шампионите.
„Секој тим може да загуби, таков е фудбалот. Мислам дека добро го започнавме првото полувреме, но потоа примивме гол од прекин. Сепак, ја вративме инерцијата и израмнивме“, започна Компани.
„На полувремето чувствував дека можеме да победиме ако продолжиме со добрата игра. Но во второто полувреме не успеавме да го најдеме ритамот. Арсенал успеа да го реши натпреварот. Тие многу добро ја контролираа играта и ги искористија малите шанси во своја полза“, рече Компани.
Ова беше прв пораз на германските шампиони оваа сезона во сите натпреварувања. Со тоа ја прекинаа серијата од 18 последователни официјални натпревари без пораз. Последен пат загубија од Пари Сен Жермен за време на Светското клупско првенство.
„Нема да барам оправдувања. Морам да кажам дека Арсенал беа подобри. Мора да покажеме што можеме во сабота. Чувствувам дека момците веќе се гладни за следниот натпревар“, додаде Компани.
Следниот натпревар на Баварците е во германската Бундес-лига овој викенд против тимот на Сент Паули, и според сè, ќе имаат шанса да се вратат на победничкиот пат.
