Фудбалерите на Комо вечерва се пласираа во полуфиналето од Купот на Италија, откако како гости го елиминираа сè уште актуелниот шампион, Наполи. По 90 минути игра резултатот беше 1-1, а Комо по вистинска драма во пенал-серијата славеше со 6-7 и обезбеди пласман понатаму.
Комо во полуфиналето ќе игра двомеч против Интер, додека во вториот полуфинален пар ќе се сретнат Аталанта и победникот од дуелот меѓу Болоња и Лацио.
Тешки денови минува екипата на Антонио Конте, испадна од Лигата на шампионите, во Серија А сè повеќе се оддалечува од одбраната на титулата, има премногу повредени фудбалери, а вечерва остана и без единствената реална шанса сезонава да стигне до трофеј.
Во првото полувреме 39 минути речиси ништо не се случуваше, а потоа следуваше голема несмасност на левиот бек на Наполи, Оливера, кој наивно стартуваше врз Хрватот Иван Смојчиќ во сопствениот казнен простор и направи пенал.
Одговорноста ја презеде уште еден Хрват од редовите на Комо, Мартин Батурина, кој од белата точка го совлада Вања Милинковиќ-Савиќ. Голманот беше многу блиску до одбрана, но сепак на семафорот стоеше 0-1.
Наполи знаеше дека мора целосно да го промени пристапот во продолжението и второто полувреме го отвори на одличен начин.
Израмни веќе во 46. минута, по брилијантна акција. Таа започна од Вања Милинковиќ-Савиќ, а на крајот Хојлунд од центарот упати совршено додавање во празен простор зад високо поставената одбранбена линија на Комо. Антонио Вергара ја избегна офсајд-замката, излезе сам пред голманот и го совлада со удар од полн трк од околу 18 метри, за 1-1.
До крајот се обидуваа и двете екипи. Наполи имаше јалова теренска иницијатива, додека Комо пропушти една голема шанса кога Вања го одбрани ударот на Пероне. Резултатот остана 1:1, што значеше дека патникот во полуфиналето ќе се одлучува преку пенали.
Елиф Елмас одигра цел натпревар, беше ефикасен и во пенал – серијата, но на крајот славеше Комо со 6-7 и се пласира во полуфиналето на Купот на Италија.
