Најтрофејниот македонски клуб Вардар стигна до првата победа во новата сезона од Првата лига, совладувајќи го Работнички со 2-0 во дербито на третото коло од шампионатот. „Црвено-црните“ беа подобар противник, особено во второто полувреме и славеа со головите на Бојан Колевски во 56.минута и на Даниел Аврамовски во 90.минута.
Првиот дел не понуди многу возбуда, но шансите и головите дојдоа во вторите 45.минута. Колевски во 53.минута го погоди дирекот, а само три минути подоцна се снајде одлично во шеснаесетникот на Работнички и одбиената топка од Шишковски ја смести во мрежата.
Работнички тргна по израмнување, се закани преку Јаго Гомес, но се отвори простор за Вардар да биде опасен преку контранапади. Аврамовски и Цветаноски не успеаја од изгледни позиции, но Вардар го потврди триумфот во 90.минута. Стрелец на голот беше Даниел Аврамовски.
