Искусниот дефанзивец на Кит Го, Иван Колев осврнувајќи се на вчерашната дерби пресметка од 21. коло во Втората лига – Исток вели дека дуелот со Брегалница на крај завршил и со реално реми.
Колев потенцира дека Кит Го пропуштил можност за предност во првото полувреме, па согласно прикажаното во вториот дел на крај двете екипи заслужиле по бод. Брегалница поведе со голот на Ристе Наумов во 55. минута, а Кит Го израмни преку Иван Настевски со гол во 74. минута.
„Одигравме одлично прво полувреме во кое постојано имавме иницијатива. Сепак, не ги искористивме своите шанси па Брегалница на почетокот од второто полувреме не казни. Но, успеавме да се вратиме, покажувајќи карактер, и на крај стигнавме до реми кое можеби беше и најреален резултат“ – вели Колев, притоа дополнувајќи:
„Во екипата владее одлична атмосфера. Се надевам дека и натаму ќе продолжиме со добрите игри и веќе на следниот натпревар против Кожуф ќе се вратиме на победите“.
