Поранешниот шеф на одделот за скаутинг на Ливерпул, Иан Греам, изјави дека Јирген Клоп не сакал во тимот да го доведе Мохамед Салах во 2017 година, бидејќи претпочитал друг фудбалер, Џулијан Брант. Истото претходно го сподели и легендата на „црвените“, Џејми Карагер.
„Јирген инсистираше да го доведеме Брант, кој беше извонреден фудбалер. Клоп добро го познаваше, бидејќи доаѓаше од Бундес-лигата и беше запознаен со германскиот пазар. Се согласивме дека Брант е импресивен талент, но не го гледавме како подобра опција од Салах. Нашата анализа покажа дека Мо е најсилното крило во Европа во тој период. Покрај тоа, Рома имаше финансиски проблеми и знаевме дека ќе можеме да го купиме по добра цена“, раскажа Греам во документарниот филм на „Би-би-си“ за освојувањето на Лигата на шампионите во 2019 година.
„Брант играше повеќе како офанзивен играч за врска, додека Салах дејствуваше по крилната позиција. Токму таков играч ни требаше. Во текот на дискусијата, Јирген беше сосема искрен и рече: ‘Добро, убедете ме дека Салах е подобар’“, додаде Иан Греам.
Ливерпул плати 42 милиони евра на Рома за египетскиот напаѓач. Оттогаш, тој има одиграно 393 натпревари и постигнато 243 гола за тимот од „Енфилд“.
