Арсенал се пласираше во полуфиналето на Лига купот на Англија, откако во драматичен четвртфинален дуел го совлада Кристал Палас со 8-7 после пенали на „Емирати“.
„Топчиите“ доминираа во текот на големиот дел од мечот, но пробивањето на цврстата одбрана на Кристал Палас се покажа како голем предизвик. Првото полувреме заврши без голови, и покрај бројните шанси на Габриел Мартинели, Нони Мадуеке и Рикардо Калафори.
Во второто полувреме, Габриел Жезус имаше две одлични шанси, но резултатот остана неизменет до 79. минута, кога автоголот на Лакроа го донесе водството за Арсенал.
Палас успеа да израмни во судиското време со погодок на Марк Гехи, што го однесе дуелот во пенали.
Сите беа прецизни до осмата серија, кога Вилијам Салиба успешно реализираше, а Лакроа не успеа да го надмудри Кепа Аризбалага. Со тоа Арсенал обезбеди дуел со Челси во полуфиналето на Лига купот.
