Јувентус официјално ја обезбеди иднината на турскиот талент Кенан Јилдиз. 20-годишниот напаѓач потпиша нов договор со „бјанконерите“ кој ќе го врзе за клубот до 2030 година, со што клубот ја осигура услугата на еден од најголемите млади адути на долг рок.
Со продолжувањето на договорот, кое е за една година подолго од претходниот, Јилдиз ќе добие значително зголемување на платата – од следната сезона неговата годишна заработка ќе изнесува 6 милиони евра, со дополнителни бонуси кои можат да достигнат до 7 милиони. Тоа го рангира меѓу највисокоплатените фудбалери под 21 година во светот.
Презентацијата се одржа во прес-центарот на клубот, непосредно пред прес-конференцијата на тренерот Лучано Спалети.
Спортскиот директор Комоли истакна:
„Јилдиз е вистинска ѕвезда, како што сугерира и името. Поседува конзистентност, амбиција и одговорност кон тимот. Благодариме, Кенан, што остана со нас. Сакаме да го вратиме Јувентус на местото кое го заслужува, а ова продолжување е првиот, но не и единствениот чекор кон тоа.“
„Благодарам на Џон Елкан, на Комоли, на соиграчите, на тренерот, на целиот клуб и на навивачите. Среќен сум што останувам во ова семејство и верувам дека ќе постигнеме големи работи. Го сакам Јувентус и знам дека секогаш ќе ја имам поддршката на приврзаниците и на моето семејство“, изјави Кенан Јилдиз.
Оваа сезона, турскиот офанзивец има 9 гола и 8 асистенции во 31 натпревар за Јувентус во сите натпреварувања. Кенан Јилдиз е дел од клубот од 2022 година, откако ја напушти младинската академија на Баерн Минхен. Со дресот со број „10“, тој досега има 115 настапи за „бјанконерите“, со 25 голови и 19 асистенции.
