Баерн Минхен брзо го остави зад себе ремито со Хајденхајм и елиминацијата од Пари Сен Жермен во Лигата на шампионите, враќајќи се на победничките патеки со минимален триумф од 0-1 на гостувањето кај Волфсбург.
Иако тимот на Вeнсaн Компани одамна ја обезбеди титулата во Бундес-лигата, баварците очигледно немаат намера да ја намалат динамиката во самиот финиш на сезоната. Баерн доминираше во поголемиот дел од натпреварот и лесно можеше да стигне до поубедлива победа, но недостигаше реализација.
Во центарот на вниманието повторно беше Хари Кејн, кој неочекувано промаши пенал во првото полувреме. Англичанецот досега имаше совршен учинок од белата точка во Бундеслигата, со 24 реализации од 24 обиди, но овојпат ја испрати топката високо над голот, иако голманот тргна во спротивна насока. Така, Кејн остана на бројката од 33 гола сезонава во германскиот шампионат.
На паузата се замина без голови, но Баерн конечно го скрши отпорот на домаќините во 56. минута. Мajкл Олисе најдобро се снајде во нападот на гостите и го постигна единствениот погодок на натпреварот, доволен за 27. победа на шампионот оваа сезона.
Поразот дополнително ја искомпликува ситуацијата за Волфсбург во битката за опстанок. Во последното коло токму дуелот со Сент Паули ќе решава кој директно ќе испадне, а кој ќе добие шанса преку баражот, со оглед дека двата тима имаат по 26 бодови.
