Јапонската фудбалска легенда Казујоши Миура, највозрасниот активен професионален фудбалер во светот, официјално потпиша договор за позајмица до јуни со третолигашот Фукушима Јунајтед, потврди клубот.
Миура во февруари ќе наполни 59 години, а со овој потег повторно му се отвора можност да настапува во рамки на Џеј-лигата, односно во една од трите највисоки фудбалски лиги во Јапонија, за првпат по пауза од пет години.
Поранешниот јапонски репрезентативец ја започна професионалната кариера во 1986 година во бразилскиот Сантош. Минатата сезона ја мина на позајмица во четвртолигашот Атлетико Сузука, каде што настапи на седум натпревари и собра вкупно 69 минути игра, без постигнат гол.
„Мојата љубов и страст кон фудбалот не се промениле, без разлика на годините. Благодарен сум за укажаната шанса и ќе дадам сè од себе за да му помогнам на тимот. Ајде заедно да испишеме историја“, порача Миура, кој се подготвува за својата 41. сезона во професионалниот фудбал.
Познат во татковината како „Кралот Казу“, ова ќе му биде четврта позајмица од 2022 година наваму од Јокохама, клуб од Втората лига на Јапонија. Иако потпиша договор со Јокохама уште во 2005 година, Миура нема одиграно ниту еден натпревар за клубот од 2020 година.
Во својата богата кариера, Миура има настапувано и во Италија, Хрватска и Австралија, оставајќи длабока трага во светскиот фудбал.
