Манчестер Јунајтед доби големо засилување за средниот ред откако го комплетираше трансферот на Јури Тилеманс од Астон Вила. Белгискиот репрезентативец потпиша петгодишен договор и кариерата ќе ја продолжи на „Олд Трафорд“.
„Црвените ѓаволи“ ја активираа откупната клаузула во договорот на Тилеманс и за неговите услуги платија 35 милиони фунти, односно околу 41 милион евра.
„Тешко ми е да опишам колку сум горд што се приклучувам на Манчестер Јунајтед. Да се потпише за толку посебен клуб е неверојатно чувство, кулминација на години посветеност откако првпат се заљубив во фудбалот“, порача Тилеманс по официјализацијата на трансферот.
Белгиецот зад себе има богато искуство во англискиот фудбал и со години е меѓу најценетите играчи за врска во Премиер лигата. Четири години беше дел од Лестер, а во изминатите три сезони го носеше дресот на Астон Вила.
Тилеманс досега запиша 244 настапи во Премиер лигата, со учинок од 26 погодоци и 39 асистенции.
Пред да пристигне во Англија, 29-годишниот фудбалер настапуваше за Андерлехт и Монако.
