Голманот на Интер, Јан Зомер, беше еден од најзаслужните за епската победа на „нерoаѕурите“ против Барселона со 4-3 по продолженија, што ги одведе во финалето на Лигата на шампионите. Со неколку неверојатни интервенции, особено во најкритичните моменти, Зомер заслужено ја доби наградата за играч на натпреварот од УЕФА.
„Многу сум среќен, ова беше навистина неверојатен натпревар“, изјави швајцарскиот чувар на мрежата. „Најмногу ќе ја паметам последната одбрана – против Ламин Јамал. Тој е фантастичен играч, но, за среќа, не постигна гол.“
Зомер посебно го пофали духот на Интер, кој не се предаде ниту кога беше во негатива.
„Многу екипи би се откажале при резултат 2-3, но не и ние. Се боревме до крај и тоа ни се исплатеше“, рече тој.
За Зомер и за целиот тим, пласманот во финалето е момент за гордост.
„Беше луд меч. Горди сме на нашиот карактер и игра. Кога сите мислеа дека сме елиминирани, ние верувавме. Финалето значи многу – не добивате многу вакви шанси. Последните четири минути во продолженијата беа како да ни е последната шанса во животот. И ја искористивме“, заврши Зомер.
Интер сега има шанса да ја освои својата четврта титула во најелитното европско натпреварување – и да ја заокружи оваа незаборавна приказна на врвот.
