Македонската судијка Ива Пројковска доби големо признание во својата кариера, откако беше назначена за четврти судија на финалето во Лигата на шампионите за жени што ќе се одигра во Лисабон.
Таа ќе биде дел од судискиот тим што ќе го води најважниот меч на сезоната, заедно со хрватските помошнички Сања Роѓак-Каршиќ и Маја Петравиќ, додека главна судијка ќе биде нивната сонародничка Ивана Мартинчиќ. За ВАР технологијата ќе бидат задолжени Тијаго Бруно Мартинс од Португалија и Момчило Марковиќ од Србија.
Ова е уште еден значаен успех за Пројковска, која досега има стекнато богато искуство на европската сцена, судејќи на многу важни натпревари.
Финалниот дуел во женската Лига на шампиони ќе се одигра на 24 мај на стадионот „Жозе Алваладе“, а ќе се соочат екипите на Арсенал и Барселона.
