Македонската фудбалска јавност денеска е завиена во црно по веста за смртта на Васил Рингов, едно од најголемите имиња што ги дал нашиот фудбал низ историјата.
Рингов беше истакнат македонски и поранешен југословенски репрезентативец, а најдлабок белег во клупската кариера го остави носејќи го дресот на Вардар. Во текот на својата богата фудбалска патека настапуваше и за белградски Партизан, Динамо Загреб, германски Ајнтрахт Брауншвајг, како и за Тетекс и Беласица, клубот во кој ги направи првите фудбалски чекори.
Во редовите на Вардар запиша над 200 официјални настапи и постигна 93 погодоци, бројки што го вбројуваат меѓу легендите на клубот.
Васил Рингов почина по кратко боледување, на 70-годишна возраст.
„Денес не жалиме само за човек, туку за едно време на мерка, чест и достоинство.
Има луѓе што не си заминуваат. Само се повлекуваат чекор наназад, за да нè гледаат од тишината.
Васил Рингов беше од тие. Тивок, исправен, свој. Фудбалот за него не беше сцена, туку одговорност. Не зборуваше многу, ама кога зборуваше, имаше тежина. Кога работеше, оставаше белег.
Денес останува споменот за човек кој веруваше дека делото е поважно од зборот, а чесноста посилна од секој резултат.
Како што велат, некои си одат, ама остануваат во игра.
Почивај во мир, драг наш Васе 🖤“, објавија од Фудбалската федерација на Македонија.
