Фудбалерот од средниот ред Мартен де Рон е изоставен од селекцијата на Холандија за Европското првенство летово во Германија.
Играчот од средниот ред на Аталанта се повреди во финалето на Купот на Италија против Јувентус пред две недели и нема да може да се опорави за почетокот на ЕП 2024, се вели во соопштението на холандската фудбалска федерација.
Повредата предизвика Де Рон да го пропушти финалето на Лига Европа против Баер Леверкузен во Даблин, кое Аталанта го доби со 3-0.
„Никогаш во животот не замислував ваква недела со толку многу подеми и падови – го загубив Купот на Италија, не можев да играм финале во Лига Европа“, изјави Де Рон на социјалните мрежи.
„Се испостави дека не можам да играм ниту на ЕВРО 2024, но ќе го надминам тоа, ќе го гледам тимот и моите пријатели како навивач. Сепак, моментот е многу тежок за мене“, додаде тој.
Мартен де Рон има 42 натпревари за Холандија, настап на минатото Европско првенство и на Светското првенство во Катар.
