Златан Ибрахимовиќ упати остри критики кон Нони Мадуеке по драматичната победа на Англија над Норвешка (2-1) во четвртфиналето на Светското првенство. Во свој стил, шведската легенда се пошегува дека дури и кабелот од „спајдер“ камерата имал подобар настап од крилниот напаѓач на Арсенал.
Ибрахимовиќ смета дека Англија практично играла со играч помалку сè додека селекторот Томас Тухел не го замени Мадуеке на полувремето.
„Паузата за освежување малку ја смени динамиката бидејќи Џуд Белингам беше најактивниот фудбалер на Англија. Но, мислам дека Англија играше со играч помалку додека Мадуеке беше на теренот. Секојпат кога ќе ја добиеше топката носеше погрешна одлука и само се шеташе по теренот“, изјави Ибрахимовиќ за „Фокс Спортс“.
Натпреварот го одбележа и контроверзниот момент кога се чинеше дека топката го допре кабелот од камерата непосредно пред израмнувачкиот гол на Белингам. Додека Норвежаните протестираа, Ибрахимовиќ ја искористи ситуацијата за уште една провокација на сметка на Мадуеке.
„Ниту паузата за освежување не му помогна. Англија практично го почна натпреварот со играч помалку. А ако топката навистина го допрела кабелот, тогаш тој кабел сигурно одигра подобар натпревар од Мадуеке“, додаде Швеѓанецот.
Ибрахимовиќ беше убеден дека Мадуеке не придонел ништо за играта и уште за време на паузата повика на негова замена.
„Да бев јас Тухел, ќе го заменев бидејќи во првите 45 минути не направи апсолутно ништо“, порача Ибрахимовиќ.
Неговиот коментар се совпадна со одлуката на англискиот селектор, кој на стартот од второто полувреме го повлече Мадуеке од игра и на негово место го внесе Букајо Сака.
И покрај пласманот во полуфиналето, каде што Англија ќе се соочи со Аргентина, останува дилемата кој најдобро може да ја пополни позицијата кога Сака не е целосно подготвен.
Иако изјавите на Ибрахимовиќ предизвикаа внимание, ФИФА остана на својот став и официјално ги отфрли протестите на Норвешка околу спорниот гол.
Светската куќа на фудбалот соопшти дека сензорот вграден во топката не регистрирал никаков контакт со кабелот пред голот на Белингам.
„Пред голот на Англија во 45+2. минута, сензорот во топката не забележа никаква промена додека таа беше во воздух. Затоа нема докази дека топката го допрела надземниот кабел и дека тоа влијаело врз нејзината траекторија“, соопшти ФИФА.
Технологијата можеби го ослободи кабелот од сите сомнежи, но, според Ибрахимовиќ, ништо не можеше да го спаси Мадуеке од неговата сурова анализа по настапот во Мајами.
