Хулијан Алварез би можел да биде главниот лик на една од најголемите трансферни саги ова лето. Според аргентинскиот „ЕСПН“, напаѓачот е подготвен да побара заминување од Атлетико Мадрид, а неговата следна дестинација треба да биде Барселона.
Наводно, аргентинскиот репрезентативец наскоро ќе го информира тренерот Диего Симеоне и клупското раководство дека сака да ја промени средината. Желбата на Алварез е јасна – кариерата да ја продолжи на „Камп Ноу“.
Барселона подолго време ја следи ситуацијата околу поранешниот напаѓач на Манчестер Сити, а тренерот Ханси Флик во него гледа идеален наследник на Роберт Левандовски.
Според истите извори, спортскиот директор Деко веќе одржал важни разговори со агентот на Хулијан Алварез, а каталонскиот клуб е решен да ги искористи сите можности за да го реализира трансферот пред крајот на преодниот рок.
Евентуалното заминување на Алварез би било сериозен удар за Атлетико Мадрид, бидејќи Аргентинецот е еден од клучните играчи во тимот и е миленик на Диего Симеоне.
Сепак, Барселона нема да има лесна задача. Алварез има договор со Атлетико до летото 2030 година, што значи дека мадридскиот клуб не е под никаков притисок да го продаде. Раководството верува дека располага со силна преговарачка позиција и нема намера лесно да се откаже од својот голгетер.
И покрај тоа, желбата на самиот фудбалер би можела да одигра клучна улога. Според аргентинските медиуми, Алварез лично ќе му соопшти на Симеоне дека сака нов предизвик, а информацијата веќе им била позната и на дел од неговите соиграчи.
Доколку Барселона успее да најде заеднички јазик со Атлетико, трансферот на светскиот шампион би можел да биде една од најголемите зделки на летниот преоден рок.
