Тренерот на Барселона, Ханси Флик, со измешани емоции ја коментираше епската победа на неговиот тим од 4-3 против Реал Мадрид во Ел Класико. Германскиот стратег ги пофали своите фудбалери за покажаниот менталитет и големиот пресврт, но истакна дека тимот мора значително да се подобри во дефанзивата.
„Ќе треба да си го прегледам срцето. Лесно е да се каже дека тактиката ни беше да дадеме четири гола – ако примиме три. Мораме многу да се подобриме дефанзивно. Кога вршиме пресинг – сè функционира, но штом направиме грешка, станува компликувано“, рече Флик.
Тој истакна дека физичката подготвеност е клучна ако Барселона сака да игра во својот препознатлив стил и дека тимот не се чувствува уште како шампион, иако е на чекор до титулата.
„Физичката подготвеност е неопходна. Не се чувствуваме уште како шампиони, но би било прекрасно да ја завршиме сезоната со три трофеи.“
Флик посебно ги истакна Феран Торес, кој одигра одличен натпревар како „деветка“, и Ламин Јамал, за кого рече:
„Тој е многу паметен, верува во себе и играше одлично иако има само 17 години. Ни помогна да направиме пресврт.“
И покрај победата, Флик беше самокритичен:
„Реал има неверојатни фудбалери кои знаат како да не нападнат во позадина. Затоа мораме подобро да се браниме. Ќе работиме на тоа за следната сезона.“
На крајот, тој додаде:
„Не сум нервозен во завршниците, но на клупата имаше многу емоции. Можеа да ни дадат и четврти гол, но не го направија тоа. Затоа велам – мораме да се подобриме.“
