Германскиот интернационалец Илкај Гундоган ќе остане дел од Манчестер Сити и во сезоната 2025/26. Според менаџерот Пеп Гвардиола, активирана е клаузулата во неговиот договор која автоматски го продолжува соработката за уште една година.
Гундоган се врати во Сити минатото лето по едногодишна авантура во Барселона, потпишувајќи едногодишен договор со опција за продолжување. Сега е потврдено дека тој ќе остане на „Етихад“ најмалку до летото 2026 година.
„Гундо има уште една година од договорот. Не знам што ќе се случи летово, но во моментов има уште една година врз основа на договорот“, изјави Гвардиола по победата од 5-2 против Кристал Палас.
Иако оваа сезона 34-годишниот плејмејкер не е секогаш стартер, сепак е важен дел од ротацијата на Сити. Тој има одиграно 2711 минути на 43 натпревари, постигнувајќи два гола и асистирајќи четири пати.
