Валенсија влегува во нова ера со голем број промени во клубот. „Лилјаците“ направија комплетен рез во спортскиот сектор, па македонскиот голман Столе Димитриевски ќе има нов тренер, но и ново раководство.
Клубот од „Месталја“ објави дека Рон Гурлеј повеќе не е извршен директор, а заедно со него заминуваат и Лисандро Исеи, Ханс Гилхаус, Андрес Замора и Малек Шафеи, кои беа дел од неговиот тим.
Одлуката е донесена со намера да се постават нови темели во спортската и управувачката структура на фудбалскиот сектор. Валенсија му се заблагодари на Гурлеј за ангажманот и придонесот во периодот поминат во клубот.
Следуваше уште една голема одлука – клубот ја прекина соработката и со тренерот Карлос Корберан.
Шпанскиот стратег ја презеде Валенсија во декември 2024 година, во период кога клубот се соочуваше со сериозни проблеми. Под негово водство екипата успеа да се стабилизира, а Корберан на клупата на „лилјаците“ запиша 72 официјални натпревари.
До именувањето на новиот тренер, првиот тим ќе го води Оскар Санчес, кој досега беше задолжен за вториот тим на Валенсија.
