Големата радост по пласманот на Франција во полуфиналето на Светското првенство беше засенета од трагедија што се случи во Оноа-Емери, на северот од земјата, каде што животот го загуби 17-годишна девојка.
Според првичните информации, таа се качила на задниот дел од камион-влекач без приколка заедно со други навивачи, славејќи ја победата на француската репрезентација. Во еден момент ја изгубила рамнотежата, паднала на коловозот и била прегазена од возилото.
На местото веднаш пристигнале пожарникари и екипи на итната медицинска помош, но и покрај брзата интервенција, можеле само да ја констатираат нејзината смрт поради тешките повреди.
Во моментот на несреќата со девојката биле уште шест малолетници. На сите им била укажана лекарска помош, а едно лице било пренесено во болница во Мобеж, каде што било задржано поради тежок шок.
Возачот на камионот е приведен и се наоѓа во полициски притвор. Надлежните органи отворија истрага поради сомнение за предизвикување смрт во сообраќајна несреќа од небрежност.
До трагичниот инцидент дојде по победата на Франција од 2-0 над Мароко во четвртфиналето, резултат со кој „триколорите“ обезбедија место меѓу четирите најдобри селекции на Светското првенство.
