Фудбалската репрезентација на Англија се најде во центарот на непријатен инцидент непосредно пред настапот на Светското првенство, откако беше ограбена додека патуваше кон својата база во САД. Пред првиот тренинг во Канзас Сити, каде што ќе се подготвува за дуелот со Хрватска, исчезнаа копачките на најголемите ѕвезди на тимот, официјалните топки на турнирот и важна тренинг-опрема.
Кражбата се случила за време на транспортот на опремата од Вест Палм Бич на Флорида до тренинг-центарот „Своуп Сокер Вилиџ“ во Мисури, каде што Англичаните ќе бидат сместени најмалку три недели. Тимот на селекторот Томас Тухел треба да го одработи првиот тренинг во сабота попладне, но персоналот во моментов се обидува да утврди што точно недостасува и со каква опрема располага.
Според информациите, меѓу преостанатите работи била пронајдена само една фудбалска топка, а постои стравување дека исчезнале и копачките на клучните играчи како Хари Кејн и Џуд Белингам.
Во тек е истрага, а сомнежите се насочени кон возачите кои биле задолжени за транспортот на опремата. Англиската фудбалска асоцијација соработува со локалната полиција во обид што побрзо да ги пронајде украдените предмети.
Англискиот стручен штаб претходно ја спакувал целата неопходна опрема за подготовките, вклучувајќи аналитичка технологија, тактичките табли на Тухел и масажни маси. Персоналот е сериозно потресен од настанот и сега се соочува со трка со времето за да обезбеди замена за опремата која е неопходна за внимателно испланираниот поход кон светската титула.
Англија и Хрватска ќе го одиграат својот натпревар од првото коло во среда.
