Арсенал оствари тесна, но заслужена победа над Евертон со 0-1 во 17. коло од Премиер лигата. Иако резултатот не покажува голема доминација, „топчиите“ контролираа поголем дел од натпреварот, создавајќи шанси и континуирано го притискаа противникот.
Единствениот гол падна во 27. минута, кога Виктор Ѓокереш го реализираше пеналот по стартот на Џејк О’Брајан. Арсенал имаше уште неколку шанси, вклучувајќи и две стативи, додека Евертон, според многумина, заслужуваше пенал во 57-та минута по стартот на Салиба врз Бери, но ВАР не покажа на белата точка.
Со оваа победа, Арсенал се врати на врвот на табелата, со два бода предност пред Манчестер Сити.
Лидс продолжи со одличната форма, убедливо го совлада Кристал Палас со 4-1 на „Иланд Роуд“. Доминик Калверт-Луин блесна со два гола во првото полувреме, додека Итaн Ампаду во 61. минута го потврди триумфот. Во финишот имаше уште по еден гол во двете мрежи.
